திருவிழா .......

நண்பனின் ஊர்த்திருவிழாவிற்கு போயிருந்தேன் . புதுக்கோட்டை அருகே கீரமங்கலம் எனும் ஊர் . மாற்றங்கள்  இருந்தாலும் கிராமம் இன்னும் கிராமமாகவே இருக்கிறது.

எனது திருவிழா, காலையிலே துவங்கி விட்டது, குளத்தின் கரைகளின் வெப்பலில் பல பறவைகளும் பட்டாம்பூச்சிகளும் சுற்றி வந்தன .
பெய்த மழை அந்தப்பெருங்குளத்தில் சிறிதே தேங்கி இருந்தது .  நீர் ஆங்காங்கே ஓடைகளாக ஓடி கால் நனைத்துக் கொண்டிருந்தது. வெயில் வெறும் வெளிச்சமாகவே இருந்தது , கண்ணுக்குத்தெரியாத குளுமை எங்களை சூழ்ந்திருந்தது .  

வெப்பல் கரைகளில் நிறைய சிறு குருவிகளைப் பார்க்க முடிந்தது , ஆனால் அவை சிட்டுக்குருவிகள் அன்று.  வேகமாகவும் குழுவாக விதவிதமான வடிவங்களிலும் பறக்கும் தி க்ரூட்ஸ் படத்தில் வரும் குருவிகள் போலிருந்தன அவை.

இரவு மாரியம்மன் கோவில் திருவிழாவில் 'ஆடலும் பாடலும் ' நடந்தது.
மாரி அலங்காரியாக, பூக்களும் பட்டும் பரிவட்டமும்  சூடி சிங்கத்தின் மீதிருந்தாள். விழா மேடையில் நிலாக்காயுது ஓடிக்கொண்டிருந்தது, உச்சகட்டமாக  ஒரு பெண்ணை தூக்கிக்கட்டி அணைத்தார் மேடையின் ஹீரோ, நூற்றுக்கணக்கானவர்கள் ஒரே நேரத்தில் கிளர்ச்சியுறுவதை விசில் ஒலிகளுனூடே  உணர முடிந்தது . ஆயிரமாண்டுகளாக ஊரில் குடியிருக்கும்  மாரியும் ,ஒப்பனையில் ஒளிந்து கொள்ள முடியாத அந்த இரவு ஆட்டக்காரியும் ஒரே மஞ்சள் ஆடைதான் உடுத்தியிருந்தார்கள்.

பெண்கள் மாவிளக்கு ஏந்தி ஊர்வலம் வர, இளசுகள் அவர்களின் இருபுறமும் நகர்ந்து கொண்டிருந்தார்கள், தோழிகளிடம் கிண்டல்களோடும்  , தன் விருப்பமானவனிடம்  கண்களால் பேசிக்கொண்டும் நகர்ந்தது ஊர்வலம். விளக்குகளின் ஒளியை விஞ்சும் கண்கள், எந்தக்காலத்திலும் மனதில் நிற்கும் காட்சி.

 புதிதாக தாலிச்சரடு மின்னும் ஒருத்தியின் கண்கள் யாரையோ தேட, ஒரு இளந்தாரி, வெள்ளைச் சட்டையோடும் குனிந்த  தலையோடும் அவளைக் கடந்தான். அந்தச்சட்டையின் பாக்கெட்டுக்குள் அழகான காதல் ஒன்று  உயிர் பிழைத்து எட்டிப்பார்த்தது.

ஊர்வலத்தின் முன்னே அழகான ஐந்து வெள்ளைக்குதிரைகள் வந்தன . அவை நடனமாடும் என்றார்கள், குதிரை எப்படி ஆடும் என்றேன், அழகாக அலங்கரிக்கப்பட்ட குதிரைகள், முதுகில் வண்ணக்குஞ்சங்கள்.  தலையில் கொண்டையாக பலவண்ணங்களில் புசு புசுவென பெருநகரத்தின் கார் துடைப்பான்கள் , இதை விட ஒரு நகரவாசியை யாரும் கிண்டல் செய்ய முடியாது.

குதிரைப்பாகன்கள் (?!) குதிரையை உண்மையில் ஆடச்செய்தனர், தாளகதியில் கால்களை த்தூக்கி ஆடின தன கால்களின் வலிமையை மறந்து விட்ட பரிகள் .  உற்றுப்பார்த்தபின் தான்  தெரிந்தது அவர்கள் குதிரையின் அடிவயிற்றில் குத்துவதும் அவை துள்ளுவதும் , உச்சமாக குதிரை இரண்டு கால்களை மேலே தூக்கி அப்படியே பேலன்ஸ் செய்தது. இதற்கும் விசில்.

இது எல்லாம் தப்பில்லையா, அது பாவம் யாராவது விலங்கு ஆர்வலர்கள் பார்த்தா கேஸ் போட்டுருவாங்க என்றேன் என்னையறியாமல் , சுற்றி இருந்தவர்கள் என்னை முறைத்தது போல் இருந்தது.

ஊரில் இறங்கியதில் இருந்து அன்பு, செல்போன் சிக்னல் இல்லாமல் கஷ்டப்பட்டான். அடுத்ததடவை வரும்போது டவர் வச்சுருவாங்க சிக்னல் கிடைக்கும் என்றான், வெப்பலில் மிச்சமிருக்கும்  சிட்டுக்களும் அப்போது  இருக்காது என்று நினைத்துக்கொண்டேன்.